सिँजादर्पण हेटौँडा । बागमती प्रदेशका उद्योगी व्यवसायीहरूले प्रदेशमा उद्योगमैत्री वातावरण निर्माण गर्न सरकारसँग माग गरेका छन् । उद्योग वाणिज्य तथा उपभोक्ता हित निर्देशनालय बागमती प्रदेश हेटौँडाको आयोजना तथा बागमती प्रदेश उद्योग वाणिज्य महासङ्घको समन्वयमा आइतबार सम्पन्न उद्योग व्यवसायसँग सम्बन्धी सरोकारवालासँगको अन्तरक्रिया कार्यक्रममा आर्थिक मन्दीको असरको चपेटामा रहेका उद्योगीहरूलाई सहुलियत हुने प्रकृतिका कार्यक्रम ल्याउन उनीहरुले माग गरेका हुन् ।
सङ्घीय सरकारले बजेटमा उद्योगी व्यवसायीका सवालमा समेट्न नसकेका विषयहरू प्रदेश सरकारले सम्बोधन गर्नुपर्ने उनीहरुले बताए । उनीहरूका अनुसार बागमती प्रदेशभित्र रहेका ३ वटा औद्योगिक क्षेत्रको विकास र व्यवस्थापनमा प्रदेश सरकारले भूमिका खेल्नु पर्नेछ । उद्योगलाई आवश्यक कच्चा पदार्थको आपूर्ति तथा उत्पादित बस्तुको सहज बजारीकरणमा सरकारले उद्योगी व्यवसायीहरूलाई सघाउनुपर्ने उनीहरूको भनाइ छ ।
कार्यक्रममा सहभागिताका तर्फबाट धारणा राख्दै उद्योगी तथा व्यवसायीहरूले विदेशबाट आयात हुने बस्तुसँगै नेपाली उत्पादनले मूल्यमा प्रतिस्पर्धा गर्न सक्ने अवस्था नरहेकाले भन्सार विन्दुमा उत्पादित वस्तु तथा कृषि उपजमा कडाइ गर्नुपर्ने बताए ।
‘राज्यले उद्योग सञ्चालन गर्ने होइन । उद्योग सञ्चालन र लगानीको वातावरण निर्माण हो । हेटौँडा कपडा उद्योग सेनालाई चलाउन दिने सरकारको नीति विरुद्ध उद्योग वाणिज्य सङ्घले आवाज उडाउनुपर्छ’ उनीहरुले भने, ‘उद्योगीलाई उद्योग स्थापनाको लागि सहज रूपमा जग्गा उपलब्ध गराउनुपर्छ । उद्योग दर्ता, नवीकरण तथा कर प्रणालीमा रहेको प्रशासनिक झन्झटलाई सरकारले सहजीकरण गर्नु पर्नेछ ।
