काठमाडौं, १९ चैत
ओम्नी समूहसँगको स्वास्थ्य सामाग्री खरिद सम्झौता बिबादित बनेपछि सो सम्झौता रद्द भएको छ । प्रधानमन्त्री केपी शर्मा ओलीको ठाडो निर्देशनमा उक्त सम्झौता रद्द भएको हो ।
कोरोना भाइरस (कोभिड १९) को रोकथाम तथा नियन्त्रणका लागि आवस्यक उपचार सामाग्रीहरु खरिद गर्न ओम्नी समूह र सरकारबीच सम्झौता भएको थियो । कोभिड-१९ परीक्षण किट, स्वास्थ्यकर्मीले लगाउने सुरक्षा कवचलगायत खरिदका ओम्नी समूहलाई ठेक्का दिएपछि बिबाद बढेको थियो । ठेक्का सम्झौतामा उल्लेखित मूल्य बजार मूल्य भन्दा कयौं गुणा महँगो भएको र ओम्नीले अनावश्यक सामान भिडाएको जस्ता आरोप लागेपछि सरकार रक्षात्मक बन्न बाध्य भएको थियो ।
देश कोरोनासंग लडीरहँदा जिम्मेवार मन्त्री र स्वास्थ्य मन्त्रालयको नेतृत्वले कैफियत गरेको भन्दै आलोचना बढेपछि सतारुढ़ दल नेकपाका अध्यक्ष प्रचण्डले अर्का अध्यक्ष एवं प्रधानमन्त्री केपी शर्मा ओलीलाई बालुवाटारमा डेढ घण्टा भेट गरी यस विषयमा सोधपुछ गरेको समेत श्रोतले बताएको छ ।
प्रधानमन्त्री केपी ओलीले संकटको बेलामा सरकारको आलोचना हुने सम्झौता लिएर अघि बढ्न नसकिने भन्दै खारेजीको निर्देशन दिएसंगै उक्त सम्झौता खारेज भएको छ । स्वास्थ्य सेवा विभागका महानिर्देशक महेन्द्र श्रेष्ठले भने ओम्नी समूहले कबोल गरे अनुसारको सामान नल्याएको र ल्याउन नसक्ने देखिएकोले सम्झौता रद्द गरेको जिकिर गरे ।
