सिँजादर्पण,काठमाडौँ — सन्दीप जोराले अन्तिम बलमा २ रन प्रहार गर्न नसकेपछि लुम्बिनी लायन्स नेपाल प्रिमियर लिग ९एनपीएल० क्रिकेटमा लगातार चौथो खेलमा पराजित भएको छ । जोरा अन्तिम बलमा आउट भएपछि आइतबार जनकपुर बोल्ट्सले लुम्बिनीलाई १ रनले पराजित गरेको हो । लुम्बिनीको ठिक उल्टो जनकपुरले लगातार चौथो खेल जितेको छ र टोली सुदूरपश्चिम रोयल्सलाई उछिन्दै शीर्ष स्थानमा उक्लेको छ ।
लुम्बिनीलाई अन्तिम दुई ओभरमा विजयका लागि २३ रनको आवश्यकता थियो । १९ औं ओभरमा लुम्बिनीले १४ रन जोडेको थियो, त्यसमध्ये १३ रन जोराका नाममा थियो । अन्तिम ओभरको पहिलो बलमै हर्ष ठाकरले साद बिन जाफरलाई शून्यमा आउट गरे । दोस्रो बलमा दुर्गेश गुप्ताले चौका प्रहार गरे । तेस्रो बलमा कुनै रन बनाउन नसकेका दुर्गेशले चौथो बलमा १ रन लिए । पाँचौं बलमा २ रन लिने प्रयासमा जोरा मुस्किलले रनआउट हुनबाट जोगिएका थिए । अन्तिम बलमा लुम्बिनीलाई जितका लागि २ रन चाहिन्थ्यो भने १ रनले स्कोर बराबर हुन्थ्यो । तर जोराले ठाकरको बल पुल गर्न खोज्दा टप एज लागेर स्क्वायर लेगमा किशोर महतोलाई क्याच दिन पुगेपछि जनकपुरले रोमाञ्चक विजय हात पारेको हो ।
त्रिवि क्रिकेट मैदान कीर्तिपुरमा लुम्बिनीका ओपनर आशुतोष घिरोहियाले पुनः निराश बनाए । उनी ८ रनमात्र बनाई आउट भए । अर्का ओपनर अर्जुन साउदले २३ बलमा २ चौकासहित २० रन बनाए । कप्तान रोहित पौडेलले ३५ रन जोडे । उनले ३८ बल खेल्दै ३ चौका प्रहार गरे । टम मुर्सले २३ बलमा ३१ रन बनाउने क्रममा २ चौका र १ छक्का प्रहार गरे । रोहित आउट भएसँगै लुम्बिनीको विकेट झर्ने क्रम सुरु भएको थियो । विवेक यादव शून्य, बेन कटिङ ३ रनमा आउट भए । जनकपुरका लागि ठाकेरले ४ ओभरमा २३ रन खर्चेर ५ विकेट लिए । ललित राजवंशीले ४ ओभरमा १३, किशोरले ३ ओभरमा २५ र शेर मल्लले ४ ओभरमा ३३ रन खर्चेर १–१ विकेट लिए । यसअघि टस हारेपछि ब्याटिङमा आएको जनकपुरले निर्धारित २० ओभरमा ९ विकेट गुमाई १ सय ३६ रन बनाएको थियो ।
उत्कृष्ट सुरुआत गरेको जनकपुर प्रतियोगितामा पहिलो खेल खेलिरहेका लुम्बिनीका अभिशेष गौतमको बलिङअगाडि एकाएक पतन हुन पुगेको थियो । देब्रेहाते स्पिनर अभिशेषले एकै ओभरमा ३ विदेशी खेलाडीको विकेट लिएपछि १२ औं ओभरमा ९५–१ को अवस्थामा रहेको जनकपुर १६ औं ओभरमा ११०–७ को स्थितिमा पुगेको थियो । अभिशेषले १३ औं ओभरमा प्रतियोगिताका सर्वाधिक रनकर्ता लाहिरु मिलान्था, हर्ष ठाकर ९१० र जिम्मी निसम ९१० को विकेट लिएका थिए । दुई ओभरपछि रोहितले मोहम्मद मोहसिन ९३० र शेर मल्ल ९०० लाई आउट गरेका थिए । अभिशेषले ४ ओभरमा २० रनमात्र खर्चेर ३ विकेट लिए ।
नेपाली यू–१९ टोलीका कप्तान हेमन्त धामी ९ रनमा आउट भए । शुभ कंसाकारले २४ बल खेली २ चौकासहित २२ रन बनाए । अभिशेष बाहेक साद बिन जाफर र रोहितले २–२ विकेट लिए । जाफरले ३ ओभरमा ११ र रोहितले ४ ओभरमा २२ रन खर्चे ।
आसिफ शेख र अनिल साहले ६ ओभरभित्र ४८ रन जोडी जनकपुरलाई राम्रो सुरुआत दिलाएका थिए । आसिफ १० बलमा २ चौका र १ छक्का प्रहार गरी १६ रनमा आउट भए । अनिलले ३९ बल खेली १ चौका र ४ छक्कासहित ४५ रन बनाए । उनलाई ुपार्ट टाइमु बलर सन्दीप जोराले आउट गरेपछि जनकपुरको पतन सुरु भएको थियो ।
