सिँजादर्पण, काठमाडौँ । प्रधानन्यायाधीश चोलेन्द्रसमशेर जबरा संसदको महाअभियोग सिफारिस समितिमा अहिले बयान दिइरहेका छन् । सिंहदरबारस्थित कानुन, न्याय तथा मानवअधिकार समितिको बैठक कक्षमा उनको बयान सुरु गरिएको हो । भदौ ८ गते बसेको महाअभियोग सिफारिस समितिको बैठकले जबरालाई आज सोधपुछका लागि बोलाउने निर्णय गरेको थियो । उनी समयमा बैठक कक्षमा पुगे पनि ढिलो गरी बयान सुरु भएको हो ।
समितिलाई जबरामाथि विभिन्न आरोप लगाउँदै नेपाल बार एशोसिएशनले ३५ बुँदे प्रमाण महाअभियोग सिफारिस समितिमा बुझाएको थियो । माओवादी केन्द्रका अध्यक्ष पुष्पकमल दाहाल प्रचण्ड र एकीकृत समाजवादीका अध्यक्ष माधव नेपालको दबाबमा प्रधानमन्त्री शेरबहादुर देउवा जबराविरुद्ध महाभियोग प्रस्ताव दर्ता गर्न तयार भएका थिए । यसअघि राजीनामा गर्न निकै दबाब दिइए पनि उनले आफू राजीनामा नदिने बरु महाभियोग सामना गर्ने बताउँदै आएका थिए । निडर र कसैसँग झुक्ने नचाहाने स्वाभावका कारण नेतादेखि अदालतमा विचौलियाहरुले जबराविरुद्ध महाभियोग प्रस्ताव दर्ता गराउन भूमिका खेलेको हो ।
उनलाई संविधान र कानूनको गम्भीर उल्लंघन गरेको, भ्रष्टाचार र गैरकानूनी सम्पत्ति आर्जन गरेको आरोप लगाइए पनि जबराले त्यो अस्वीकार गर्दै आएका छन् । प्रधानन्यायाधीश राणालाई गत फागुन १ गते सत्तारुढ दलका सांसदहरुले महाभियोग प्रस्ताव संसदमा दर्ता गराएका थिए । दर्ता गरेको छ महिनापछि प्रक्रिया अघि बढाइएकाले यसको वैधानिकतामा पनि प्रश्न उठेको छ ।
