सिँजादर्पण, काठमाडौँ, १० साउनः प्रधानमन्त्री केपी शर्मा ओलीले नेपाल सरकारको मुख्यचिवमा पहिलो महिलाका रुपमा लीलादेवी गड्तौला नियुक्त हुनुभएकामा बधाई व्यक्त गर्नुभएको छ ।नेपालले बिहीबार लिलादेवी गड्तौलालाई पहिलो महिला मुख्य सचिवको रूपमा पाएको हो । प्रधानमन्त्री तथा मन्त्रीपरिषद् कार्यालयको सचिव हुँदै उनले मुख्य सचिवसम्मको जिम्मेवारी पाएकी हुन् ।प्रधानमन्त्री ओलीले आज सामाजिक सञ्जाल फेसबुकमार्फत ‘देशभरको कर्मचारी प्रशासनको नेतृत्व गर्नेमा पहिलो पटक महिला हुनुभएकामा बधाई दिनुभएको हो । बिहीबार दिउँसो २ बजे बसेको मन्त्रीपरिषद् बैठकमा प्रधानमन्त्री केपी शर्मा ओलीले पहिलो एजेण्डा नै कामु मुख्यसचिव गड्तौलाई मुख्यसचिवमा नियुक्त गर्ने प्रस्तुत गरेका थिए । त्यसपछि उनी मन्त्रीपरिषदबाट मुख्यसचिवमा नियुक्त भएकी हुन् ।
मुख्यसचिवमा नियुक्त भएलगतै राष्ट्रिय महिला आयोगले गरेको कार्यक्रममा सहभागी भएकी उनले प्रधानमन्त्री ओलीप्रति आभार व्यक्त गरिन् । उनले आफूलाई थप जिम्मेवारीको महसुस भएको बताउँदै भनिन,‘आज मन्त्रिपरिषद्ले गरेको निर्णयसँगै मलाई थप जिम्मेवारी बोध भएको महसुस भएको छ । नेपालको इतिहासमा सायद भाग्य र कर्म दुवैले हुनुपर्छ, पहिलो महिला मुख्यसचिव हुन र देशको नाम राख्न मलाई अवसर प्राप्त भयो । यसमा मेरो मात्र भूमिका छैन, मलाई कामु मुख्यसचिव बनाउन र मुख्यसचिवको लागि पनि सारा महिलाहरूले अव्यक्त भावनाहरू व्यक्त गर्नु भएको थियो । धेरैले यसपालि महिला मुख्यसचिव दिनुपर्छ भन्नुभएको थियो ।’प्रधानमन्त्री ओलीका अध्यक्षतामा आज भएको मन्त्रिपरिषद्को बैठकले कायममुकायम निमित्त मुख्यसचिव गड्तौलालाई मुख्यसचिवमा नियुक्त गर्ने निर्णय गरेको थियो ।
