सिँजादर्पण, काठमाडौं । अनधिकृत रूपमा ‘काठमाडौं भ्यू टावर’को नक्सा पास गरेको भन्दै मेयर बालेन शाहले काठमाडौं महानगरपालिकाका प्रशासकीय प्रमुख सरोज गुरागाईंलाई हाजिर गर्न नदिइ अपमानित गरिएको थियो । घर बिदामा बस्न बाध्य बनाएको १०३ दिनपछि गुरागाईंले बिहीबार कर्मचारीको सहयोगमा हाजिर गरे । लगत्तै मन्त्रालयमा ब्रिफिङ पनि गरे । गत पुस ५ पछि कार्यालय जान नपाएका काठमाडौं महानगरपालिकाका प्रमुख प्रशासकीय अधिकृत गुरागाईं बिहीबार कार्यपालिका सदस्य र कर्मचारीहरूको बलमा महानगर छिर्दा एक प्रकारको तनाव भएको थियो । लामो समयसम्म हाजिर गर्न नपाएका प्रमुख प्रशासकीय अधिकृत गुरागाईं बिहीबार एक्कासी हाजिर गर्न आउने सूचना आएको आएपछि मेयर बालेनले रोक्ने अनेकन प्रयास गरे । बिहीबार बिहानै मात्र गुरागाईं कार्यालयमा हाजिर गर्न आउने सूचना फैलिँदै गर्दा मेयर बालेन भने काठमाडौं बाहिर थिए ।
काठमाडौंबाट विदा मनाउन धुलिखेल पुगेका मेयर साहलाई प्रशासकीय अधिकृत गुरागाईं हाजिर गर्न आउने सूचना पुर्याइएको थियो । गुरागाईं हाजिर गर्न आउने भनेपछि बालेन सचिवालयले नगर प्रहरीलाई जसरी पनि रोक्न आदेश दिएको थियो । कुनै पनि हालतमा हाजिर गर्न नदिन नगर प्रहरीलाई बालेन सचिवालयले निर्देशन दिएको थियो । नगर प्रहरी पनि गुरागाईंलाई रोक्न कस्सिए । कमलादीस्थित महानगरको कार्यालयको मुल ढोकामा बिहानैदेखि महानगरका सुरक्षाकर्मीहरू तैनान गरियो । उता महानगरमा कार्यरत कर्मचारीहरू गुरागाईंको स्वागतमा बसिरहँदा नगर प्रहरी भने गुरागाईंलाई गेटमै रोक्न लागिपरेको थिए । कर्मचारीहरूको समूह एकातिर खादा माला बोकेर गुरागाईंको स्वागत तयारी गर्दै थिए भने अर्कोतिर मेयर बालेनविरुद्ध नाराबाजी भैरहेको थियो ।
नगर प्रहरी लगाएर भएपनि गुरागाईंलाई हाजिर गराउन नदिन मेयर शाहको सचिवालयले निकै कसरत गरेको थियो । तर, महानगरका कर्मचारी र उपप्रमुख सुनीता डङ्गोलसहित वडाध्यक्षहरु गुरागाईंलाई हाजिर गराउनुपर्ने पक्षमा उभिएपछि बालेनले कानुन विपरित गरेका सुरक्षाकर्मीको कुनै जोड चलेन । गुरागाईंलाई स्वागत गर्न उपमेयर डङ्गोल नै उपस्थित भएकी थिइन् । कर्मचारीहरूले ३ महिनादेखि तलब नपाएको, महानगरको आर्थिक विकासको काम ठप्प भएको भन्दै जनप्रतिनिधिहरू गुरागाईंलाई हाजिर गर्न दिनुपर्ने भन्दै केही दिनअघि नै मेयरको कार्यकक्षमा पुगे पनि उनले कुनै जवाफ दिएका थिएनन । कर्मचारीहरूले दबाब दिन थालेपछि उनले संघीय सरकारलाई गाली गरेर सामाजिक सञ्जालमा स्टाटस लेखेका थिए । तीन महिनाभन्दा लामो समयसम्म प्रमुख प्रशासकीय अधिकृत नहुँदा महानगर ठप्प जस्तै थियो ।
महानगरको आर्थिक कारोबार ठप्प भएको थियो । तर, नक्सा पासको विषयमा गडबडी गरेको भन्दै गुरागाईंलाई हाजिर गर्न नदिन अड्डी कसेका बालेनले यसपटक कर्मचारीहरूसँग झुक्नु परेको छ ।संघीय सरकारलाई बारम्बार नयाँ प्रमुख प्रशासकीय अधिकृत पठाउन बालेनले पत्रदेखि सामाजिक सञ्जालमा स्ट्याटस लेखेर नयाँ प्रमुख प्रशासकीय अधिकृत पठाउन संघीय सरकारलाई दबाब दिएका थिए । तर, प्रमुख प्रशासकीय अधिकृतको व्यवस्थापन गर्ने संघीय मामिला तथा सामान्य प्रशासन मन्त्रालयले बालेनको प्रस्ताव अस्वीकार गर्यो । महानगरमा प्रमुख प्रशासकीय अधिकृत बहाल रहेको भन्दै नयाँ मान्छे पठाउन संघ सरकारले अस्वीकार गर्दै आएपछि विवाद बढ्दै गएको थियो । गुरागाईंलाई हाजिर गराउनुपर्ने अडान राख्दै आएको थियो । तर बालेन भने गुरागाईंलाई हाजिर नगराउने आफ्नो अडानमा कायम थिए ।
कुनै हालतमा हाजिर गर्नै नदिने रणनीति बालेनको थियो । जसका लागि बिहीबार बालेनले तीन रणनीति अपनाए ।प्रमुख प्रशासकीय अधिकृत आउने हल्लापछि बालेनले उनलाई रोक्न अनेक विधि प्रयोग गरेका थिए । त्योमध्ये एक प्रमुख प्रशासकीय अधिकृतको गाडीमा ‘ह्वील लक’ लगाइदिएका थिए । नगर प्रहरीलाई परिचालन गर्दै बालेनको सचिवालयले प्रमुख प्रशासकीय अधिकृतको गाडीमा ह्वील लक लगाइदिएपछि कर्मचारीहरू झन आक्रोशित भएका थिए । गेटमा स्वागतमा बस्दै गर्दा कर्मचारीहरूले गुरागाईंलाई लिन गाडी पठाउने तयारी गर्न थाले । यो थाहा पाएपछि नगर प्रहरीले पार्किङमा रहेको प्रमुख प्रशासकीय अधिकृत चढ्ने महानगरको गाडीमा ह्वील लक लगाएको थियो । ह्वील लक लगाएको खबर पाएपछि कर्मचारीहरूले नगर प्रहरीलाई चेतावनी दिए । तर उनी आएर हाजिर गरी फर्केका छन् । शुक्रबार उनी कार्यालय आउछन या आउदैनन भन्नेचाहि खुलेको छैन । तर कर्मचारीहरुले शुक्रबार गुरागाई आएर नियमति काम गर्ने बताएका छन् ।
