सिँजादर्पण, काठमाडौँ । उपप्रधान तथा अर्थमन्त्री विष्णुप्रसाद पौडेलले सरकारले अब भन्सार मूल्याङ्कनका लागि ‘सन्दर्भ मूल्य’ को व्यवस्था हटाएर वास्तविक ‘कारोबार मूल्य’ लाई आधार बनाउने बताएका छन् । बुधवार राष्ट्रियसभा अन्तर्गतको विधायन व्यवस्थापन समिति बैठकमा भन्सार विधेयकमा भएको छलफलमा बोल्दै यस्तो बताएका हुन ।
अर्थमन्त्री पौडेलले कारोबार मूल्यको आधारमा भन्सार शुल्क लिइने बताए । अर्थमन्त्री पौडेलले भने, ‘ हामी अब कारोबार मूल्यमा भन्सार लिन्छौँ। सन्दर्भ मूल्यको व्यवस्थाबाट बाहिर निस्किन्छौँ । कम मूल्यको बीजक बनाएर हुने राजस्व छली ९अन्डर इन्भोइसिङ० जस्ता समस्या समाधान गर्न यो नीतिगत परिवर्तन आवश्यक छ।’ अर्थमन्त्री पौडेलले भन्सार प्रणालीलाई आधुनिक, पारदर्शी र अन्तर्राष्ट्रिय मापदण्ड अनुकूल बनाउन विधेयक ल्याइएको स्पष्ट पारे । उनले प्रविधिको अधिकतम प्रयोगमार्फत भन्सार छली र चुहावट नियन्त्रणमा सरकारले कठोर कदम चाल्ने प्रतिबद्धता व्यक्त गरे । मन्त्री पौडेलले नेपाल ‘क्योटो महासन्धि’को पक्ष राष्ट्र भएकाले त्यसका प्रावधानहरू कार्यान्वयन गर्न पनि नयाँ कानुन अनिवार्य भएको बताए । उनले भने,‘विद्यमान ऐनलाई पटक–पटक संशोधन गर्नुभन्दा एकीकृत र सुदृढ कानुन बनाउनु आवश्यक देखियो। यो विधेयकले भन्सार कानुनलाई संशोधन र एकीकरण दुवै गर्छ।’
सरकारले प्रस्तुत गरेको भन्सार विधेयकले नेपालको अन्तर्राष्ट्रिय व्यापारलाई सहज, सरल र सुरक्षित बनाउनुका साथै भन्सार प्रशासनलाई पारदर्शी र उत्तरदायी बनाउने उनको भनाई थियो । उनले नेपालले अनुमोदन गरेको ‘संशोधित क्योटो महासन्धि’ लगायतका अन्तर्राष्ट्रिय प्रतिबद्धता पूरा गर्न र भन्सार प्रक्रियालाई आधुनिकीकरण गर्न नयाँ विधेयक आवश्यक परेको स्पष्ट पारे । विधेयकले स्वदेशी उद्योगको संरक्षण, निकासी प्रवर्द्धन, वैध व्यापारको सहजीकरण र अवैध व्यापारको प्रभावकारी नियन्त्रण गर्ने लक्ष्य राखेको मन्त्री पौडेलको भनाइ छ।
