सिँजादर्पण,अमेरिकी संस्थापन पक्षको भित्री जानकारी राख्ने द न्युयोर्क टाइम्सले युक्रेन युद्धका विषयमा बुधवार रोचक सामग्री पस्किएको छ । लारा जेक्सको बाईलाइनमा प्रकाशित समाचारमा उल्लेख गरिएअनुसार, तीन महिनाअघि युक्रेनी सैनिकहरूले रुसी सेनालाई पछि धकेल्न असमर्थ भएपछि युक्रेनले युद्धभूमिमा नयाँ हतियार ल्याएको थियो । यो रकेट लोन्चर, तोप वा अर्को कुनै भारी हतियार थिएन । यो त डेल्टा नामक तत्काल सूचना दिने प्रणाली थियो । यसले रुसी सैनिकहरूका विषयमा महत्त्वपूर्ण जानकारी दिएको थियो ।
नेटोको समन्वयमा विकसित गरिएको यो सफ्टवेयरलाई युद्धमा यसअघि परीक्षण गरिएको थिएन । तर खर्सन क्षेत्रमा प्रत्याक्रमणका साथ अघि बढेको युक्रेनी सेनाले डेल्टाको उपयोग गरी रुसीहरूलाई विभिन्न गाउँ र शहरबाट पछि धकेलेका थियो । उनीहरूले पश्चिमले पठाएको भारी हतियारले पनि सहायता गरेको थियो । गत साता रुसी सैनिकहरू खर्सन शहरबाट पछि हटेपछि युक्रेनमा तैनाथ डेल्टाको उपयोगिता प्रमाणित भएको छ । अत्याधुनिक हतियार तथा सूचना प्रणालीहरूको परीक्षण गर्ने थलो युक्रेन बन्दै गएको उदाहरण डेल्टाले दिएको छ । यस्ता हतियार र तिनको नवीन उपयोगले आगामी पुस्ताका युद्धलाई आकार दिने पश्चिमा अधिकारीहरू बताउँछन् । पुरानो किसिमको युद्धकला युक्रेनमा प्रदर्शन भइरहेको भए पनि प्रविधि र प्रशिक्षणमा आएको फड्कोलाई पश्चिमाहरूले नजिकैबाट नियालिरहेका छन् । ती प्रविधिले कसरी युद्धको मुहार फेरिरहेका छन् भन्ने यसबाट देखिएको छ ।
डेल्टाबाहेक रिमोट कन्ट्रोलबाट चल्ने डुंगा र ड्रोननिरोधी स्काईवाइपर जस्ता हतियार पनि युक्रेनमा तैनाथ गरिएका छन् । अनि जर्मनी आफैंले परीक्षण नगरिसकेको एउटा जर्मन हवाई प्रतिरक्षा प्रणाली पनि युक्रेनमा तैनाथ गरिएको छ । युक्रेनका उपप्रधानमन्त्री मिखाइलो फेदोरोभले युक्रेन युद्धको राम्रो परीक्षण भूमि भएको बताएका छन् । सैन्य प्रविधि तथा आधुकिन युद्धकलामा आएको क्रान्तिकारी परिवर्तनलाई यस युद्धले प्रदर्शन गर्ने अवसर दिएको उनको कथन छ । गत अक्टोबर महिनामा भर्जिनियाको नोरफोकमा आयोजित नेटो सम्मेलनमा उनी बोलिरहेका थिए । त्यहाँ उनले पहिलोपटक डेल्टाको चर्चा गरे ।
