सिँजादर्पण, काठमाडौं । काठमाडौँ महानगरपालिका स्वीट्जरल्याण्डको लुगानो शहरमा आयोजना हुने ‘स्वीस टुरिजम अवार्ड–२०२३’ का लागि छनोट भएको छ ।
सन २०२३ को संस्करणका लागि आगामी नोमेम्बर ३ देखि ५ तारिखसम्म आयोजना हुने उक्त कार्यक्रममा महानगरलाई छनोट गरिएको हो । आयोजकले उक्त अवार्डका लागि काठमाडौँ महानगरलाई पत्र पठाएको छ । महानगरका मेयर बालेन्द्र शाहलाई अवार्ड कमिटिद्वारा लेखिएको पत्रमा ‘स्वीस पर्यटन अवार्ड, २०२३’का लागि काठमाडौँ महानगरलाई छनोट गरिएको जनाउँदै कार्यक्रम हुने समयमा उपस्थितिका लागि पनि निमन्त्रणा गरिएको छ ।
अवार्ड समितिले काठमाडौंको सांस्कृतिक इतिहास, धार्मिक सम्पदा र जीवन्त शहरी वातावरणले आगन्तुकलाई मोहित बनाउने उल्लेख गरेको छ । पत्रमा भनिएको छ, ‘काठमाडौंको सुन्दरता यसको समृद्ध सांस्कृतिक इतिहास, यसको धार्मिक सम्पदा र यसको जीवन्त शहरी वातावरणमा निहित छ, जसले विश्वभरका आगन्तुकहरुलाई मोहित बनाउँछ’ नोमेम्बरमा हुने अवार्ड कार्यक्रमका लागि समितिले महानगरका मेयरलाई निमन्त्रणासहित पत्र पठाएको छ ।
विगत १५ वर्षदेखि सञ्चालन हुँदै आएको यस अवार्डका लागि स्थानिय तह महानगरपालिका, उपमहानगरपालिका, नगरपालिकाले आवेदन दिन सक्छन् । अवार्ड कार्यक्रममा स्वीट्जरल्याण्ड, इटालीसहित अन्तर्राष्ट्रिय क्षेत्रमा गन्तव्यको प्रचार गरिन्छ । यस्तै सम्मानित हुने शहरमा पर्यटनको मूल्य र पेशाका विषयमा चर्चा गरिन्छ ।
