फुटबल खेलाडी आशिष लामाले पनि आफूलाई नुवाकोटको विदुर नगरपालिकास्थित घरमा कृषिकर्ममै व्यस्त राखेका छन् । कतारमा हुने तय भएको विश्वकप छनोटको दोस्रो चरणमा प्रतिस्पर्धा गरिरहेको नेपालको राष्ट्रिय टोलीको बन्द प्रशिक्षण २ चैतदेखि सुरु भएको थियो । तर, नेपालमै कोरोना भाइरसको संक्रमण देखिन थालेपछि ९ चैतमा प्रशिक्षण स्थगित भयो । प्रशिक्षक योहान कालिन स्विडेन फर्किए भने खेलाडी पनि आ-आफ्नो घरतर्फ लागे । ‘त्यसलगत्तै घर फर्केर खेतीपातीमा व्यस्त छु,’ उनी भन्छन् ।

गाउँमा यतिवेला वर्षभरिका लागि दाउरा जम्मा गर्ने चटारो छ । दोस्रोपटक मकै गोड्ने समय पनि हो, यो । सहिद स्मारक लिगको गत संस्करणका सर्वाधिक गोलकर्ता खेलाडी उनी परिवारसँग दाउरा काट्न र मकै गोड्न व्यस्त छन्, यतिवेला । १२ वैशाख ०७२ को भूकम्पलगत्तै उनी घर पुगेर करिब २२ दिन बिताएका थिए । फुटबलको करिअर अगाडि बढाएयता उनले यति लामो समय घरमा बिताएको यो पहिलोपटक हो ।

राष्ट्रिय फुटबल टोलीकै स्ट्राइकर अञ्जन विष्ट पनि अहिले हेटौँडास्थित घरमा पुगेका छन् । पोखरामा सम्पन्न आहा-रारा गोल्डकप खेलेर घर पुगेका उनी लकडाउनका कारण उतै अड्किए । आहा-रारा गोल्डकपमा सहभागी राष्ट्रिय टोलीका खेलाडीलाई बन्द प्रशिक्षणमा राखिएको थिएन । दैनिक घरायसी कामबाट फुर्सद निकालेर अभ्यासमा जुट्छन्, उनी ।

बन्द प्रशिक्षण स्थगित भएपछि पोखरा महानगरपालिकाको लेखनाथस्थित घर पुगेका फुटबल खेलाडी अजित भण्डारी पनि कृषिकर्ममै व्यस्त छन् । धानखेतीको तयारीका लागि खेतको आली ताछ्ने र भित्ता खुर्किने काम चलिरहेको छ, अहिले । गाउँघरमा साथीभाइसँग उनी त्यसैमा व्यस्त छन् । ‘कहिले साथीभाइ आएर सघाउँछन्, कहिले उनीहरूकोमा गएर काम गरिन्छ,’ उनी भन्छन्, ‘गाउँघरमा अर्मपर्मको चलन अझै हराएको छैन ।’ करिब १२ वर्षपछि उनी यसरी खेतीपातीमा संलग्न भएका हुन् । अब धान रोपेरै काठमाडौं फर्किन पाइने उनको आशा छ ।

नेपाली राष्ट्रिय क्रिकेट टोलीका खेलाडी दीपेन्द्रसिंह ऐरीलाई करिब पाँच वर्षपछि यसपटक धान रोप्ने अवसर जुरेको छ । गाउँघरमा हुर्केका सबैजसो खेतीपाती भनेपछि हुरुक्कै हुन्छन् । ऐरीमा पनि खेतीप्रतिको त्यस्तै मोह छ । क्रिकेटमा करिअर सुरु भएयता उनले धान रोपाइँमा रम्ने अवसर पाएका थिएनन् । ‘यसपटक बल्ल त्यो अवसर पाएको छु,’ उनी भन्छन् ।