सिँजादर्पण, पोखराः पोखरा अन्तर्राष्ट्रिय विमानस्थलको उद्घाटन गर्न प्रधानमन्त्री पुष्पकमल दाहाल प्रचण्ड पोखरा आइपुगेका छन्। प्रधानमन्त्री प्रचण्डलाई विमानस्थलमा पोखरा अन्तर्राष्ट्रिय विमानस्थलका प्रमुख बिक्रम गौतमले स्वागत गरेका छन्। विमानस्थलको उद्घाटन भएसँगै हवाई उडान आजबाट औपचारिकरुपमा सुरु हुनेछ।
प्रधानमन्त्री प्रचण्डसँगै उपप्रधानमन्त्री तथा अर्थमन्त्री विष्णु पौडेललगायत विभिन्न राजनीतिक दलका शीर्ष नेताहरु पोखरा आएका छन्। उद्घाटन समारोहमा कार्यक्रम नागरिक उड्डयन प्राधिकरणले गरेको हो भने जनसहभागिता र प्रचारप्रसारको जिम्मा पोखरा महानगरपालिकाले लिएको महानगर प्रमुख धनराज आचार्यले बताए।
करिब पाँच दशकदेखिको पोखरेलीको अन्तर्राष्ट्रिय विमानस्थल सञ्चालन हुनुपर्ने सपना पुरा भएको दिनलाई विशेष बनाउन महानगरले सार्वजनिक बिदा समेत दिएको छ।
